കൊല്ലം: നെടുമണ്കാവ് ഇളവൂരില് ദുരൂഹ സാഹചര്യത്തില് കാണാതായ ആറുവയസ്സുകാരിയുടെ മൃതദേഹം സമീപത്തെ പുഴയില് കണ്ടെത്തി. പള്ളിമണ് പുലിയില ഇളവൂര് സ്വദേശികളായ പ്രദീപ്-ധന്യ ദമ്ബതികളുടെ മകള് ദേവനന്ദയുടെ മൃതശരീരമാണ് കണ്ടെത്തിയത്. കുട്ടി വീടിന് മുന്നില് കളിച്ചുകൊണ്ടിരിക്കുന്നതിനിടെയാണ് വ്യാഴാഴ്ച രാവിലെ 10.15 ഓടെ കാണാതായത്.
രക്ഷിതാക്കളുടെ പരാതിയില് കണ്ണനല്ലൂര് പൊലിസ് അന്വേഷണം ഊര്ജിതമാക്കി വരവേയാണ് ഇത്തിക്കരയാറ്റില് നിന്ന് മൃതദേഹം കണ്ടെത്തിയത്. വീടിന്റെ നൂറുമീറ്റര് അകലെയാണ് പുഴസ്ഥിതിചെയ്യുന്നത്. കുട്ടി പുഴയില് വീണിരിക്കാമെന്നു സംശയമുണ്ടായിരുന്നു. ഈ സാഹചര്യത്തിലാണ് പുഴയില് തെരച്ചില് ആരംഭിച്ചത്. മുങ്ങല് വിദഗ്ധരാണ് മൃതദേഹം കണ്ടെത്തിയത്. കുട്ടിയെ കാണാതായ സമയത്ത് ധരിച്ചിരുന്ന വസ്ത്രങ്ങളാണ് പുഴയില് നിന്ന് ലഭിച്ച മൃതദേഹത്തിലുള്ളത്.
ഇന്നലെ രാവിലെ 9.30നും 10.30 നും ഇടയിലാണ് കുട്ടിയെ കാണാതായത്. കുട്ടിയുടെ അമ്മ ഈ സമയം തുണി അലക്കി കൊണ്ടിരിക്കുകയായിരുന്നു. സമീപപ്രദേശത്തെ ക്ഷേത്രത്തില് ഉത്സവ ചടങ്ങുകള് നടക്കുകയാണ്. ഉത്സവത്തോട് അനുബന്ധിച്ചാണ് കുട്ടി ഇന്നലെ സ്കൂളില് നിന്ന് അവധിയെടുത്തത്.
അഞ്ച് കിലോമീറ്റര് ചുറ്റളവിലുള്ള മുഴുവന് സി.സി.ടി.വി ക്യാമറകളും പരിശോധിച്ചിരുന്നു. എന്നാല് എങ്ങനെയാണ് കുട്ടി പുഴയില് വീണതെന്നോ ആര്ക്കെങ്കിലും മരണത്തില് പങ്കുണ്ടോ എന്ന കാര്യത്തില് ഇപ്പോഴും ദുരൂഹത നീങ്ങിയിട്ടില്ല.
കുട്ടിയെ കാണാതായ വിവരം അറിഞ്ഞതോടെ ക്ഷേത്രകമ്മിറ്റിക്കാരും നാട്ടുകാരും ഉള്പ്പെടെയുള്ളവര് തിരച്ചില് നടത്തിയിരുന്നു. കുട്ടിയുടെ തിരോധാനത്തില് ബാലാവകാശ കമ്മീഷന് ഇന്നലെ കേസെടുത്തിരുന്നു.
Comment:*
Nickname*
E-mail*
Website
Save my name, email, and website in this browser for the next time I comment.